Nɔ" ‑tiiɛ' 'di ‑ɛ 'ma Tʋ "bo
80
'Dʋ ‑wlʋa 'e 'dʋ ‑jeopoi klaa" 'a 'dʋsbɛ 'di ɛ, ‑bo nyʋ a seɛ ble ɛ nyʋ a blɛɛ ‑si' ‑plʋ, Asafʋ 'a 'dʋ.
2 Israɛ ‑kɔʋn 'a i fuoi‑
‑ɩn ‑te' doun" 'de 'ʋn o,
‑mɔ ɔ kʋan Sosɛfʋ "juɛi
ka nyɔ ɔ kʋan 'e nɔ" dɩ 'a ‑gbaapʋ‑ 'mla a.
‑Mɔɔ Tʋ"bodɛ nɩa 'e selibɛn'a 'a ‑kwea'‑ a,
‑ɩn ‑ke ‑ma 'beɔdɛ 'wlʋʋ de.
3 'De Eflaimʋ o, Bɛnsamɛ ke Manase' "juɛi
‑ɩn ‑to ‑ma "ikmaa'! ‑Ɩn ‑je ‑a 'pʋʋ‑.
4 Kea, ‑ɩn nʋɛ ‑a ‑je deji,
‑ɩn kpʋn ‑a sɩn 'sɔɔn ‑wɛe ‑a ‑je 'pʋ.
5 'Oo Tʋ "bo, Kea nʋa' 'blʋa ke jaʋn ɛ,
nɔ" ‑jɛɛ 'di ‑ma 'cɛn 'je 'wla
‑wɛe ‑ɩn ‑je ‑ma "nynuu 'a baewlu kpʋn ‑ɛ?
6 Ʋʋ diɛ diiɛ 'de "jri 'a "ni 'ʋn,
‑wɛe ‑ma nʋɛ ʋʋa 'na "miini ‑sea' dbaa ‑ta 'ble ɛ.
7 ‑Mɔ nʋɛ ‑wɛe nyʋ ‑ke ‑a ‑kʋaan"‑ i a poo ‑a ‑kli "kpei,
‑wɛe ‑aa tʋnyʋ a wlaa ‑a ‑ʋn.
8 "Sʋɩ ‑nɩa 'e jaʋn 'di 'a Kea,
‑ɩn nʋɛ ‑a ‑je deji,
‑ɩn kpʋn ‑a sɩn 'sɔɔn ‑wɛe ‑a ‑je 'pʋ.
9 ‑Ɩn cnuɛn" finyɛ‑b ‑nɩa 'de Esipʋ
‑wɛe ‑ɩn nʋ 'blʋa 'dinyʋ i 'de ‑ɩn doɛ 'de ‑kwɔo de.
10 ‑Ɩn ‑bɛɛ' ɛ ‑wee'‑ "klein 'dewei,
ɛ poɛ 'sɩn, ɛɛ' 'sɩn cɛn 'blʋa 'ʋn 'ɛ
'sʋ ɛ ‑gbaa 'blʋa "kpei
11 ɛɛ' ‑fli pooɛ crɩ "kpei,
‑wɛe ɛɛ' 'dae ‑kɔ' ti klae" nyɔ ɔ 'daa‑ Sɛdrɩ ɛ.
12 Ɛɛ' 'dae mu ɩ je 'tɔniɛ jɛɛ‑
‑wɛe ɛɛ' "nynuu ‑mɩ jɛɛ Eflatɩ.
13 Dɛɛtɩ‑ ‑ɩn ‑wla ɛɛ blo'
‑wɛe nyʋ ‑a ‑sia' ‑wee'‑ a jiɛ "jriia'.
14 Nyna 'wɛ ‑mɛɛ' ‑suu' ɛ i, ‑wɛe 'kwladinmii a diɛ.
15 "Ikma Kea, ‑ɩn ji de, ‑ɩn ‑gbʋn 'nɔ ‑sɔn
‑wɛe ‑ɩn ‑jeɛ 'je ‑ɩn ‑tu" finyɛ‑ ‑nɛɛ' ‑tɩ'.
16 ‑Ɩn ‑tu" tu ‑ma ‑cɛ" 'kpa doa 'a ‑tɩ',
tu ju ‑ma ‑cɛ" 'kpa doa 'a ‑tɩ.
17 Ɛ ‑wee'‑ nʋɛ 'jrʋ, ɛ ‑gba' ja,
'de ‑ma 'cɛn jri 'di ɛ, ɛ ‑wee'‑ a muɛ i sɔan'.
18 ‑Ɩn ‑tu" "ju ‑nɩa 'e ‑ma diianfɔ o ‑tɩ',
‑ɔɔ "ju tu 'bɛai" 'de ‑ma ‑tɩ' 'ʋn ɛ.
19 ‑A se ‑ʋn kɩɩn tɛɛn i 'bode,
‑ɩn ‑nyɩ" ‑a 'kmʋnɩa', ‑aa muɛ ‑ma 'nynɩ "i 'bɛɛa'.
20 'Oo Tʋ "bo, jaʋn 'di sʋɩ" 'a Kea,
‑ɩn kpa ‑a "jɛi, ‑ɩn ‑sa ‑ma ‑cɛ" 'kwla
'de ‑a pee ‑aa muɛ 'pʋʋa'.